ກົດຕິດຕາມເພຈ ປະກາດ Pakaad

ຄະນະສະເພາະກິດ ກວດພົບຜູ້ຕິດເຊື້ອພະຍາດໂຄວິດ19ເພີ່ມອີກ 2 ຄົນທັງໝົດເປັນຄົນລາວ ແຕ່ເປັນກໍລະນີນໍາເຂົ້າໃນນີ້ເປັນເພດຊາຍ ແລະຍິງ, ຜູ້ຊາຍຄົນລາວໄດ້ສຳເລັດການຝຶກອົບຮົມຢູ່ໄຕ້ຫວັນຂອງຈີນ, ສ່ວນແມ່ຍິງ ເປັນນັກສຶກສາລາວທີ່ໄປສຶກສາຢູ່ສະຫະລັດອາເມລິກາ ທັງສອງຄົນເດີນທາງຜ່ານສະໜາມບິນອິນຊອນຂອງສາທາລະນະລັດເກົາຫລີ ແລ້ວກັບມາລາວດ້ວຍຍົນສາຍການບິນລາວຖ້ຽວບິນQv 922 A ລໍາດຽວກັນໃນວັນທີ 12 ສິງຫານີ້ ໂດຍມີຜູ້ໂດຍສານທັງໝົດ 115 ຄົນ ເຮັດໃຫ້ມາຮອດປະຈຸບັນລາວມີຜູ້ຕິດເຊື້ອໂຄວິດ19 ທັງໝົດ 22 ຄົນ ປີ່ນປົວດີແລ້ວ 19 ຄົນ ແລະສືບຕໍ່ຕິດຕາມອາການຢູ່ໂຮງໝໍລວມເປັນ 3 ຄົນ.

ໃນໂອກາດຖະແຫລງຂ່າວກ່ຽວກັບສະພາບການແຜ່ລະບາດຂອງພະຍາດໂຄວິດ-19 ປະຈຳວັນທີ 14 ສິງຫານີ້, ທີ່ກະຊວງສາທາລະນະສຸກ ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ແຈ້ງໃຫ້ຮູ້ວ່າ: ຜູ້ໂດຍສານທັງໝົດທີ່ເດີນທາງມາດ້ວຍເຮືອບິນລໍາດຽວກັນຈໍານວນ 115 ຄົນໄດ້ເກັບຕົວຢ່າງໄປກວດແລ້ວເຫັນວ່າມີຜົນບວກ 2 ຄົນ ຄືກໍລະນີທີ 21 ແລະ 22 ປະຈຸບັນທັງ ສອງຄົນແມ່ນໄດ້ຖືກກັກຕົວຢູ່ຫ້ອງແຍກປ່ຽວເພື່ອຕິດ ຕາມອາການຢູ່ໂຮງໝໍມິດຕະພາບ 150 ຕຽງ ເນື່ອງຈາກທັງສອງບໍ່ມີອາການຜິດປົກກະຕິ ຫລືເປັນໄຂ້, ໄອ ແລະລະບົບຫາຍໃຈກໍ່ປົກກະຕິດີ ແຕ່ເຖິງຢ່າງໃດກໍ່ຕາມຄະນະສະເພາະກິດເພື່ອປ້ອງກັນ ຄວບຄຸມ ແລະແກ້ໄຂການລະ ບາດຂອງພະຍາດໂຄວິດ19 ຍັງສືບຕໍ່ເຝົ້າລະວັງ ແລະຕິດ ຕາມກໍລະນີສົງໃສ ລວມເຖິງຜູ້ຖືກຈໍາກັດບໍລິເວນຢູ່ສູນກັກກັນຕ່າງໆ ເພື່ອດຳເນີນມາດຕະການຢ່າງເຂັ້ມງວດ ແລະຮັດກຸມ.

ໂອກາດນີ້ທ່ານ ພູທອນ ເມືອງປາກຍັງຮຽກຮ້ອງເຖິງປະ ຊາຊົນລາວບັນດາເຜົ່າໃນຂອບເຂດທົ່ວປະເທດ ບໍ່ໃຫ້ແຕກຕື່ນຈົນເກີນໄປ ແລະບໍ່ໃຫ້ຕີລາຄາວ່າການຕິດເຊື້ອຂອງ 3 ກໍລະນີໃໝ່ນີ້ບໍ່ແມ່ນການລະບາດຮອບໃໝ່ ຍ້ອນວ່າເປັນການຕິດເຊື້ອຂອງບຸກຄົນທີ່ເດີນທາງເຂົ້າມາລາວ ແລະສາມາດຄຸບຄຸມໃຫ້ຢູ່ສະເພາະບຸກຄົນນັ້ນບໍ່ໄດ້ແຜ່ຂະຫຍາຍອອກສູ່ວົງກ້ວາງ ພ້ອມນີ້ຍັງເນັ້ນໃຫ້ຜູ້ທີ່ໄປຮັບໄປຕ້ອນຍາດຕິພີ່ນ້ອງທີ່ເດີນທາງມາຈາກຕ່າງປະເທດຈົ່ງດຳເນີນມາດຕະການປ້ອງກັນຢ່າງເຂັ້ມງວດ ເປັນຕົ້ນໃຫ້ຫລີກລ່ຽງການສຳຜັດກັນ, ຕ້ອງໃສ່ຜ້າອັດປາກດັງ ຊື່ງນອກຈາກເປັນການປ້ອງກັນຕົນເອງຈາກເຊື້ອພະຍາດໂຄວິດ19ແລ້ວ ຍັງປ້ອງກັນຄົນທີ່ທ່ານຮັກຈາກເຊື້ອພະຍາດນີ້.

ໂດຍ: ຈັນທະສອນ ສີຫານາດ

ກົດຕິດຕາມເພຈ ປະກາດ Pakaad