ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ພ້ອມດ້ວຍຄະນະໄດ້ລົງຕິດຕາມການຜະລິດຜ້າປິດປາກອະນາໄມ ຢູ່ໂຮງງານຜະລິດຜ້າປິດປາກອະນາໄມໄອໂຊລອຍ ແລະ ໂຮງງານຜະລິດຜ້າປິດປາກອະນາໄມ ນານາຊິນ ຕັ້ງຢູ່ ບ້ານ ດົງນາທອງ ເມືອງ ສີໂຄດຕະບອງ ນະຄອນຫຼວງວຽງຈັນ ໃນມື້ວານນີ້ ວັນທີ 8 ກໍລະກົດ 2020.
ທ່ານ ຮອງນາຍົກລັດຖະມົນຕີ ໄດ້ກ່າວເນັ້ນໃຫ້ບັນດາ ໂຮງງານຜະລິດເອົາໃຈໃສ່ສືບຕໍ່ປັບປຸງລະບົບການຜະລິດໃຫ້ມີຄວາມເປັນລະບຽບ ພ້ອມທັງຕ້ອງມີວິຊາການຊ່ຽວຊານມາໃຫ້ການແນະນຳການຜະລິດເພື່ອໃຫ້ການຜະລິດໄດ້ຮັບຄຸນນະພາບສູງສຸດຮັບປະກັນໃຫ້ສາມາດນຳໃຊ້ເຂົ້າໃນການປ້ອງກັນເຊື້ອພະຍາດຕ່າງໆ, ໃຫ້ປະສານງານກັບກະຊວງສາທາລະນະສຸກເພື່ອກວດກາ ແລະ ອະນຸຍາດມາດຕະຖານຄຸນນະພາບຂອງຜະລິດຕະພັນເພື່ອກ້າວໄປເຖິງການນຳອອກຈຳ ໜ່າຍ ນອກຈາກນັ້ນ ຕ້ອງໄດ້ເອົາໃຈໃສ່ຄວບຄຸມລາຄາຈຳໜ່າຍໃຫ້ມີລາຄາສົມເຫດສົມຜົນເພື່ອໃຫ້ປະຊາຊົນລາວໄດ້ຊົມໃຊ້ຜະລິດຕະພັນຜ້າປິດປາກທີ່ຜະລິດຢູ່ພາຍໃນ.
![](https://pakaad.com/wp-content/uploads/2020/07/screenshot_20200710_0519051739264551893274933.jpg)
ໂຮງງານຜະລິດຜ້າປິດປາກອະນາໄມໄອໂຊລອຍໄດ້ເລີ່ມການສ້າງຕັ້ງຂື້ນໃນຕົ້ນປີ 2020, ໄດ້ນຳເຂົ້າເຄື່ອງຈັກທີ່ທັນສະໄໝ ແລະ ມີມາດຕະຖານສູງຈາກ ສປ ຈີນ, ປະກອບມີ: ເຄື່ອງຈັກຜະລິດຜ້າອັດປາກສາມຊັ້ນຈຳນວນ 2 ເຄື່ອງ, ເຄື່ອງຍິບສາຍເກາະຫູແບບອໍໂຕມາຕິກຈຳນວນ 1 ເຄື່ອງ, ເຄື່ອງຍິບສາຍເກາະຫູແບບໃຊ້ແຮງງານຄົນຈຳນວນ 1 ເຄື່ອງ, ເຄື່ອງຈັກຂ້າເຊື້ອຈຳນວນ 1 ເຄື່ອງ, ເຄື່ອງຈັກຫຸ້ມຫໍ່ຈຳນວນ1ເຄື່ອງ, ເຄື່ອງຈັກຍິງກາໂລໂກ້ຈຳນວນ 1 ເຄື່ອງ ໂດຍທາງໂຮງງານໄດ້ເນັ້ນການຜະລິດຜ້າອັດປາກ ອັດດັງເພື່ອການຈຳໜ່າຍພາຍໃນ ແລະ ຕ່າງປະເທດໂດຍຈະເນັ້ນການຈຳໜ່າຍພາຍໃນເປັນສ່ວນໃຫຍ່.
ປັດຈຸບັນ, ໂຮງງານແມ່ນຍັງຢູ່ໃນຂັ້ນຕອນເປີດທົດລອງການຜະລິດ, ນໍາໃຊ້ແຮງງານຜະລິດທັງໝົດ 8 ຄົນ, ຄວາມອາດສາມາດໃນການຜະລິດ 3 – 4 ແສນອັນຕໍ່ມື້ ແລະ ມີຄວາມພ້ອມໃນການຕອບສະໜອງຄວາມຕ້ອງການຂອງສັງຄົມລາວ ແລະ ຕ່າງປະເທດ ຊຶ່ງປັດຈຸບັນແມ່ນກຳລັງຢູ່ໃນຂັ້ນຕອນການຂໍອະນຸຍາດໃບຢັ້ງຢືນດ້ານຄຸນນະພາບຈາກກະຊວງສາທາລະນະສຸກ.
![](https://pakaad.com/wp-content/uploads/2020/07/screenshot_20200710_0519238680975701370007004.jpg)
ສະເພາະ ໂຮງງານຜະລິດຜ້າປິດປາກອະນາໄມນານາຊິນ, ປັດຈຸບັນແມ່ນໄດ້ຕິດຕັ້ງເຄື່ອງຜະລິດ 1 ເຄື່ອງ, ສຳລັບວັດຖຸການຜະລິດນຳເຂົ້າຈາກປະເທດໄທ ແລະ ພວມຢູ່ໃນຂັ້ນຕອນທົດລອງການຜະລິດ ແລະ ຕິດຕັ້ງເຄື່ອງຂ້າເຊື້ອສຳລັບພະນັກງານທີ່ຈະເຂົ້າໄປຜະລິດ, ພ້ອມທັງຂໍໃບຢັ້ງຢືນມາດຕະຖານດ້ານຄຸນນະພາບຈາກກະຊວງສາທາລະນະສຸກ ຄາດວ່າຈະເລີ່ມເປີດການຜະລິດຜ້າປິດປາກອະນາໄມຍີ່ຫໍ້ NNUP ອອກສູ່ສັງຄົມໃນທ້າຍເດືອນກໍລະກົດນີ້ ເຊິ່ງຄວາມອາດສາມາດໃນການຜະລິດແມ່ນ 1 ນາທີຕໍ່ 80 ອັນໂດຍຈະຈຳໜ່າຍຢູ່ພາຍໃນ 30% ສ່ວນທີ່ເຫຼືອແມ່ນສົ່ງອອກຕ່າງປະເທດ.